معلمة ف البادية
نحكي ليكم قصتي سمعوا لي
تخرجت معلمة عينوني ف البادية
خليت الميمة تبكي ما سخات بي
يا الميمة تهلاي ف ولادي امين ورقية
راجلي عينوه ف الاقاليم الجنوبية
تشتت الشمل يا اختي هنية
ف محطة الكيران ودعني بويا وخويا
انا راضي عليك يا بنتي سمية
وصلت البادية مع العشية
استقبلني المدير ومعاه رئيس القروية
مرحبا بالاستاذة سمية
سكنت مع المعلمة فطوم من الراشدية
ف الليل شلا مغامرات حكات لي
ركبني الخوت غرغروا عيني
تفكرت ولادي والدي
طلع النهار المدرسة بعيدة ع الدوار
ركبت مع صاحبتي ع الحمار
المدرسة صغيرة فيها وليدات صغار
الجبال لخلا والقيفار
لا حمام لا سوق لا سبيطار
شوف من حالي ياعالم لسرار
حسيت بالخوف ب النهار
الله يصبرك يا مدام المدير وخمسة الاقسام
البارح كملت العام
حياتي دازت بكا وتخمام
خاصمتني الضحكة على ليام
شكون يزورني يدق الباب
راني عاشة ف لعذاب
توحشت ولادي مجمع لحباب
مرضت جاني الاكتئاب
الغربة صعيبة يا لحباب
ف النهار نسمع صوت الطيور ولغراب
ف الليل يخوفني صوت موكا والذياب
انا مرا من حقي نخاف
ما عندي راجل نسخن به لكتاف
عيب وعار عينت الراجل ف المدينة
لمرا ف الدوار
جمعوا شملي مع راجلي والوليدات
نشوف الضحكة نحس بالحياة
قريبة من اهلي والدي
خوتي وجيراني دايرين بي
لي داز يسلم لاباس عليك يا سمية
انا ف الدار ف الصباح راجلي ف العشية
نتمنى من وزارة التربية الوطنية
تشوف ف هاد القضية
تجمع الراجل مع مراتو
يرتاح يعيش حياتو..................................................................
زجال الغرب
حسن البرارحي
سيدي يحي الغرب
تحية عالية الى المعلمات اللواتي يمارسن مهنة التعليم
بالبادية لكم مني الف تحية والف سلام
دامت لكم المسرات والافراح
ليست هناك تعليقات:
إرسال تعليق