.................البحر..........
محلاك يا ابحر ف الليل
السنارة زايخة والجو اجميل
بها اتذوب اهمومي والدمع ايسيل
لبحر الهايج كله مواويل
امشاركني احزاني كلها عويل
النار اكدات ف اضلوعي
والشمعة اطفات واتهرس القنديل
لمواج امعانقاني،فكرتني ب لخليل
لمنارة ضاوية للبحارة خير دليل
ونا غاب اعلي الزهر،اهجرني لعشير
لما شافوني الناس انحدث راسي
كالو مسكين اهبيل
لبحر دوا أو كلمني...
قالي مالك اعليل
احكيتلو ما بي وابكا امعايا
حطهوم دمعات والشتا اتسيل
قلتلو اتكايس اعلى راسك
خذ امسح ادموعك ب هاذ المنديل
زاد ابكا أو قالي أنا ليك انميل
اتعانقنا ابزوج والدمع اسيل
غنينا ابزوج لحن احزين اجميل
واحكالي ما به القيتو رجل أصيل
القيت ما بي من امحاين اقليل
لما اصبح الحال واتفاهمنا بالتويل
لمواج عانقت الشطآن عناق اطويل
لبحر عانقني أو گالي سير ف حالك
راه سرك امخبي ف بير
اتفاجيت لما شفت الشمس ضاوية
والجو امنسم اعليل
لمراكب راجعة حامدة الله الجليل
والبحارة كلهم شكر أو تهليل
شفت شوفة وحدة ف لبحر
القيتو يشعل اشعيل...
ودعتو أو قلتلو يا الزين اديالي
أنت اصحيبي مليكش امثيل
بالسلامة راه حان وقت الرحيل...
محمد مهداوي
ليست هناك تعليقات:
إرسال تعليق