**** أحلام ****
قالوا لي حظك نار
وتعالي شوف النجوم
السعد ليك بيلالي
ما راح يسيبك يوم
ريح دماغك يا صاحبي
لا شهادة ولا دبلوم
ولا أيد تشق الصخر
وتعب وذل ولوم
ورئيس في الشغل يخنق
واليوم تلاقيه مخصوم
كفاية يا صاحبي عليك
راحة وأكل ونوم
كل اللي تعبه وشقيوا
غرقوا في الهموم
اسمع نصيحتي تلاقي
نفسك بين النجوم
أنا قلت في عقل بالي
اوعاك وراهم تعوم
لا نجوم بتعرف غيب
وغير الكفاح ما يدوم
هو طريق النجاح
وآخره رحيق مختوم
شوف اللي عاشوا تنابله
بين البشر مذموم
عايش حياته عواله
ومن حب الناس محروم
وفكر عنده مفيش
جهله صبح محتوم
عقول تلعب بفكره
كفر وضلال وغيوم
وأخر الطريق تلاقيه
يندب يقول مظلوم
بالذمة أيه الأفضل
عشان تكون معلوم
كفاح وأيدين عرقانة
وألا الجري ورا النجوم
بقلم الشاعر / مصطفي كرم
**** Mostafaa Karm ****
ليست هناك تعليقات:
إرسال تعليق