تكريم الحمار
=========
من بعد ظلم وعيشة مرار
عرفوا بقيمتك اه يا حمار
تسير تحمل ليل ونهار
ونهيق بيطلع من الاغوار
ويزقوا يعنى الحمل تقيل
تقع يشدوك بالجنازير
يصرخ يقول علشان مسكين
الضرب يعنى شمال ويمين
صديق فقير تخدمه من نار
ومكافأته شى بقى ياحمار
تخدم تلاقى العيشة مرار
من شلة فاسدة من الاشرار
ولا كان فى رحمة للحيوان
والظلم كان سببه الانسان
يحملوا ويزيدوا أحمال
والاه بتطلع من الشيال
والبردعة بتمشى الحال
ويكسبوا كتير من الاموال
ويزيدوا دايما من الاعمال
ولا مرة زادوا عودين برسيم
او كيس درة مع فول وشعير
او حتى فسحة للتحرير
وعودين قصب والمص عصير
طب ليه حرام لما تكافؤه
بتطحنوه وبكرباج تدوه
لو كان قوى كنتم سيبتوه
وتبعدوا عنه وتخافوه
وتشيلوا عنه وتدللوه
وتبوسوا رجله ورجل ابوه
ويقولوا طيب قوى وعبيط
ولا عنده لؤم او فى تربيط
وعربية كارو يجر احمال
وكرباج يطرقع كده فى الحال
ولا مرة يعنى رفضت تسير
وطالبت تكريم او تغيير
تمشى بهمة وصبر كبير
والظهر مقسوم من التشغيل
والصبر رمزك كده وسلاح
والقوة عندك من الفتاح
والسعر كان ملاليم وقليل
ويقولوا اصله حمار وهبيل
ولا رفض يعنى وثورة تصير
ولا اعتصام وطلب تغيير
وفجأة ظهروا كتير فاسدين
وقالوا ده لازم له التكريم
الفروة تسوى يعنى كتير
مطلوبة دايما كده فى الصين
تعمل فياجرا حبوب تسخين
وتحل أزمة بشكل كبير
واللحمة حنبيعها لفقير
ونقول كباب او كفتة تصير
واهو كله يعنى من البروتين
والسعر فرصة وتمنه قليل
واهى زى لحمة من البرازيل
تفرج فى ازمة للمساكين
وكل قطعة عشان توفير
مخصصة فى السوق بضمير
ولا فى تهاون او تقصير
والاقتصاد مافيهوش تهدير
وسعره اصبح غالى وكبير
حمار ومسلوخ للتصدير
ويقولوا ده هدفنا وشعار
محاربة لغلاء الاسعار
وتمنه زاد اضعاف فى نهار
بجشع وسرقة من التجار
ده سوق ولازم له احتكار
وتنظيم بدقة عشان تحتار
ويقولوا ده احسن تكريم
لا يملكه معدوم ويهين
والثروة تبقى بالملايين
بس لغنى او حوت وكبير
يفهم ويعرف فى التقييم
ويسلك الحوض والمواسير
لو فى مراقبة بشكل كبير
او حتى تفتيش ويا ضمير
ما كان ده حالنا وصار تغيير
والحل فى عقاب مع تأميم
والسعر اصبح غالى ونار
برغم انه مسكين وحمار.
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون
ليست هناك تعليقات:
إرسال تعليق