ياقصيدتي
مالك تلفتي
علي توضرتي
تغيرتي
وتبدلتي
مابقيتي
كيف كنتي
خلليتيني
عليك نتسارى
جلت ف جلاولي
عليك نبري
لگیتني غادي
نجري من وراك
تابعك مسري
بنت لي نجمة
ف السما محزمة
لابسها الضحكة
طرت ب الفرحة
عشقك گلبي
بدموعه عليك بكى
لگیت ضحكتك
غير مسوكة
گلت علاش
مابقتيش لي
مسوقة
واش گلبي فيك ما بقى
نويت تماك نلقاک
نهضر معاك
نشوف مالك
لگيتك شللى
علي مدرگة
عطيتني بلگفی
زدتي خلفه
مشيتي
خلليتيني
هنا بارك
درتي لبلان
اللي جاك سالك
واش أقصيدتي
هادا هو حالك
غير گري لي
گولي مالك
حسن عوان
خاطري معاك
ياقصيدتي مالك
واش غير حالك
تلفتيني ف سوق راسي
خلليتيني بغرامك نقاسي
نبري على راسي
تايه بين الصفوف
نبري ونشوف
عقلي مخطوف
انج ف الحروف
تالف بين القصايد
نحصد ف الكلام
بمنجل الخاطر
نمطط ونحط
مرة ف السطر
مرة تحت الخط
نجني من الهضرة
نوادر لگجام
ندیر منها عرام
نشوفهاگدامي
نجمعها لنهار
الدراس
ندير ليها گاعة
فوگ الراس
ندرس وندري
بمدرة ليام
نعزل الكرفة
عل الصافي
نعبر ونوفي
نقسمها تقسام
باش مانتلام
نخرج العشور
من خاطري المقهور
ندير ديوان
دايزه الكلام
نجمع اهل الحروف
وكل من هو نظام
نخلليك أقصيدتي
على خاطرك
کاملة مكمولة
بالتمام
بقلم حسن الزايري
مجدوب عين أسردون
قصيدتي ::::::😲😲🍒🏥قصيدتي
ليست هناك تعليقات:
إرسال تعليق