عروبه مسروقه
***************
لملم جراحك يا وطن
وبلاش تدور ع الولاد
مهما تزيد فوقك محن
برضو السواد هو السواد
رجالة الحق انتهوا
واتبدلوا غيرهم رماد
معدش فيه راجل جدع
ولا عدش فيه فرسان شداد
بيت ورا التاني اتنهب
واحنا لازلنا ف العناد
متمرغين ف بحور فتن
والظلم بينا زاد وساد
أشكي لمين قهر الوطن
للورقه ولا للجماد
الكل باع وقبض تمن
وعلي الفقير دايما سداد
يا بحور بقت مليانه دم
م اللي اتعدم او م اللي مات
بفلوس اخونا بنضرب
بايدين اخونا بنضرب
بصمت قاده بنضرب
والكل تايه ف الشتات
الزرع مات والميه جفت
والأمل أصبح فتات
النور صبح شمع اتحرق
والصوت بقي بيزعق سكات
والكل واقف ف الفرح
لكن الفرح التاني مات
ببكي عليك يا وطن غريب
زرعك من الجدر اتحرق
يا عروبه تاهت ف البلاد
طفلك بقي حبة قلق
عايش في وسط دموع حزين
محروم يشوف بسمة أمل
في ايديه ورود دبلانين
والحزن ف عينيه اكتمل
هصرخ بقلمي علي الورق
يمكن نفوق للي احنا فيه
بيت ورا التاني اتسرق
ومعدش شئ نداري فيه
معدش شئ نداري فيه ‘‘‘‘‘‘
بقلمي
8/4/2017
ليست هناك تعليقات:
إرسال تعليق