احمد (إيه معنى الإسلام )
إيه معنى الإسلام يا صاحبي ... إيه معنى الإسلام ؟
الإسلام نخوة و معامله ... وتسامح و سلام
الإسلام أخلاق ... ويّا الخير سبَّاق
ومحبّه لكل البشريّة ... و تواضع وحياء
ــــــــــــــــــــــــــــــــــــــــــــــــــ
الاسلام وجدان و طهارة ... ومباديء و إيثار
والإيمان بالله و بكتبه ... والرسُل الأبرار
وملايكة سَجَّادَهْ ... للمولى وحمَّاده
مخلوقين من نور وحياتهم ... بين تسبيح و عبادة
وليوم القيامة حياتهم ... بين تسبيح و عبادة
ــــــــــــــــــــــــــــــــــــــــــــــــــــــ
الاسلام تحسن الى جارك ... مهما يكون غلطان
مسلم ولاّ مسيحى . يهودي ... الدين للديان
انت مواطن مصري ... هوّه مواطن مصري
بينكوا مواطنة وجيره , أُخوَّة ... بالعربي و بالمصري
ــــــــــــــــــــــــــــــــــــــــــــــــــــــــــــــ
الإسلام رحمة وتفاهم ... حب يَزهَّرْ طيبه
الإسلام جَوْهرْ مش مظهر ... ولا لحية و زبيبة
الإسلام إصلاح ... دنيا و دين وفلاح
عسر ويسر وحكمة و صبر ... ويّا عَرق و كفاح
ـــــــــــــــــــــــــــــــــــــــــــــ
الإسلام قال أُعبد ربك .. دايما خاف مولاك
صحى ضميرك ربّك شايفك ... أي مكان وياك
حلّل قرشك حلّل ... لو كان حتى قليّل
تلقي المولى يزيد و يبارك .. في الرزق و في العيّل
ــــــــــــــــــــــــــــــــــــ
احمد محمود الشاذلي
ليست هناك تعليقات:
إرسال تعليق