وحق لي الحق
وحق لي الحق
سفينة سيدي يحي قريبة تغرق
وحق لي الحق
هاد الزمان يجري كيف لبرق
وحق لي الحق
مات الصدق ضاع الحق
وحق لي الحق
هدا زمان كذب نافق زوق
وحق لي الحق
كثر لمسخ ولفسق
وحق لي الحق
مول المعقول حسبوه احمق
وحق لي الحق
مانا مجنون مانا مهبول
ورثنا من لجداد لكلام الرباعي فن القول
وحق لي الحق
هاد الوقت كيف الغول
مابقا لا صدق لا معقول
وحق لي الحق
الحق سدوا عليه جوج قفول
الباطل ف الدنيا يصول ويجول
وحق لي الحق
جابوه بالغيطة والطبل
دبحوا لخرفان كملوا بالعجل
وحق لي الحق
لي ركب لابد ينزل
لي سمن لا بد يهزل
وحق لي الحق
عييت ف لحروف نغزل
لا لمدينة ضحكت لا واد تيقلت حمل
وحق لي الحق
كلشي منهم هرب وجفل
ركلونا ركلة لبغل
شعارهم حفظناها قول بلا فعل
وحق لي الحق
رباو فينا الخوف ف الصغر عنداك خوخو بعل
وحق لي الحق
صابنا الجوع ولقمل
حصدوا الصابة بالمنجل
وحق لي الحق
سيدي يحي خاصها مول الحكمة ولعقل
غرفوا الميزانية بالسطل
وحق لي الحق
كثر ف المدينة التشرميل والقتل
وحق لي الحق
ملينا من النفاق وشعارات ارحل
شوفوا من حال المدينة اعطيونا حل
وحق لي الحق
حتى واحد ما بقا ف الدنيا غافل
سباب التشرميل القرقوبي والجهل
الحاصول
لهلا يخطينا الرمى وفن القول
زجال الغرب
حسن البرارحي
سيدي يحي الغرب
ليست هناك تعليقات:
إرسال تعليق