يوميات مدام علاء الدين☆☆☆بقلم نهلة التهامي

#يوميات_مدام_علاء_الدين

(6)

الواحد مبيعرفش قيمة الحاجة اللى لما تغيب عنه. أخيرا استلمت البساط السحرى من الدراى كلين. ما قدرش أوصف سعادتى بيه قد ايه. دا شايل عننا بلاوى . اه و الله. من غيره احتسنا و تعبنا و حصلنا اللى عمرنا ما تخيلناه. بس خلاص الايام دى الله لا يرجعها و ربنا يديم علينا نعمة البساط الطاير. ناويت أعمل حفلة على الضيق بالليل بمناسبةعودة البساط لدياره سالما غانما و بالمرة نحتفل بانتهاء الاوراق المطلوبة فى المصالح الحكومية. النهاردة اتحركنا الساعة ثمانية الا عشرة ما احنا طايرين بقى لا تقولى لجان و لا كماين. وصلنا المبنى العتيد الساعة ثمانية بالظبط دقة دقة يعنى. ركنا البساط جنب الباب و لسة هنقرب من مدخل المبنى لقينا طابور. استغربنا طبعا ايه ده طلع ان النظام هنا ان الناس بتيجى الطابور من الفجر. فين و فين لما ربنا كرمنا و وصلنا لمكتب الاستعلامات عشان يقولنا نطلع لمدام سناء فى الدور الرابع. بصة واحدة على طابور الاسانسير خليتنا ناخد السلالم أسرع. فى الدور الرابع وسط القوافل البشرية حاولنا نوصل لباب اى مكتب عشان نسأل بس عن مكتب مدام سناء انما ايه هيهات ثم هيهات. أخيرا ردت علينا حاجة عجوزة مش بتشتغل فى المكان لآ دى مواطنة ليها مصلحة بس عرفت المكان بالخبرة.ز المهم وصلنا للمدام و الساعة بقت تسعة. لسة بدرى فى مينت و نخلص. مدام سناء ست طيبة بشوشة ملاك ماشى على الارض. ببسمة مشجعة قالتلنا على الورق المطلوب و راجعت معانا ايه اللى ناقص. طلع عاوزين استمارة من الدور الاول مفيش مشكلة. نزلنا نجيب الاستمارة اللى تمنها خمسة جنيه تمام. لآ مش تمام عشان لاقينا طابور طويييييل عاوزين الاستمارات. وقف علاء الدين فى الطابور و وقفت جنبه. ايه المشكلة مش فاهمة فجأة قامت الدنيا  عشان فاكرين اننا بنخم و انى بتحايل على الوقوف فى الطابور. فين و فين لما اقتنع الناس اننا مش عاوزين الا استمارة واحدة و اثباتا لحسن النوايا وقفت بعيد. رجلى نملت و شرايين رجلى اعلنت احتجاجها و هددت بترك الزمام للدوالى للأخذ بالثأر. المهم كنت خلاص هموت و أقعد لغاية ما لقيت واحد بيشاورلى. قلقت و بصيت على عيلاء الدين ألاقيه منهمك فى حوار مع زمايله فى الطابور و مش واخد باله منى أصلا. الراجل بيقرب و بيشاور بحركات مش مفهومة و قبل ما أطلق سارينة الانذار بصرخة طويلة كان وصل و قالى مش عاوزة استمارة يا عسل. طبعا نطق الكلمة السحرية المتمثلة فى استمارة خليتنى اتغاضى عن معاكسته. وافقت فورا انى اشترى منه الاستمارة بخمستاشر جنيه. أيوة تلات أضعاف قيمتها بس مش مشكلة المهم نخلص و أقعد فى أى حتة ان شاء الله على الرصيف. خدت الاستمارة و روحت لعلاء الدين عشان يطلع من الطابور و نلحق مدام سسناء. بصراحة هى لسة بشوشة بس استغربت أوى من السرعة اللى رجعنا فيها بالاستمارة المهم قالتلنا محتاجيين تأشيرة من استاذ مكرم فى الدور السابع. الاسانسير فى وقت الراحة و موقفينه. أمرنا لله طلعنا لأستاذ مكرم لاقيناه أجازة عمرة و لسة هيرجع بعد اسبوع. رجعنا لمدام سناء اللى البسمة اختفت من وشها و الطيبة اتسربت ممنها و هى بتقولنا نستنى استاذ مكرم لما يرجع. ليه مفيش بديل لو ربنا ريحه من الدنيا و بلاويها الدنيا هتقف و مصالح الناس تقف ليوم الساعة عشان مفيش غير تأشيره استاذ مكرم. بعد ما الصوت على و الخناقة كبرت جاء الحل فى شكوى للمدير. ثوانى اوعوا تفتكروا اننا اطراف فى الخناقة لآ ابسلوتلى نوت الموضوع ان فيه ناس بقالها شهرين مستنين رجوع مكرم من العمرة و بيجوا  كل يوم يطممنوا على رجوعه بالسلامة لغاية لما فاض بيهم. طبعا مشينا مع ثورة الغاضبين لحد المدير اللى  فى الدور التانى و اللى قرر ان أنسة ولاء فى الدور السابع تقوم بعمل استاذ مكرم لحين عودته بعد عام. طلعنا على السابع و وقفنا طابور كنا اخر ناس فيه عشان نلاقى واحدة راسمة قوس قزح على وشها و بدأت تضغط على نفسها عشان هتسيب الموبايل و تمضى على استمارات الناس. المهم جه دورنا بعد ساعتين عشان تقولنا فوتوا عليا بكرة. نعم أومرينا خير ان شاء الله صوابعك اتشلت مش قادرة تمضى ورقة كمان. الساعة بقت واحدة و نص ده ميعاد الانصراف قولنا فوتوا عليا بكرة. مش هقول ازاى كنا تانى يوم مستنين فى نص الطابور اللى واقف على باب ولاء. الهانم جات الساعة تمماية اه عشان الامضة و قعدت ساعة بتحكى مع زميلتها و طلبت فطار و الحمد لله قالت تسلى نفسها بكام تأشيرة عقبال ما يجى الفطار. أخيرا وصلنا لقوس قزح اللى بهت على لبسها الجامع لكل ألوان الكون مع علينا المهم اننا حصلنا على التأشرة نزلنا لمدام سناء اللى أول ما شافتنا  قالتلنا ناقص ختم من الدور الاول. نزلنا نختم الورق و نقف فى طابور صغنن بتاع عشرين واحد بس. طلعنا لسناء اللى فرت الورق كله قبل ما تقول فين اللدمغة الدمغة فى نفس مكتب الختم مجبتوش ليه. تتشكى فى قلبك يا بعيدة هننزل تانى يعنى. نزلنا و عقبال ما طلعنا ملقيناش سناء مشيت أصلها بتمشى الساعة اتناشر بالظبط. لاااااااااااا كدة كتييير. أه يا انا من المواصلات للمصالح يا قلبى لا تحزن.

#نهلة_التهامى