الهيت ...شعيب صالح المدكوري

الْهَيتْ
***
هَيَّتْ يَا هَيَّاتْ
هَيَّتْ ؤُزِيدْ هَيّتْ
بَرَّد جْنُونِي
سَرَّحْ سْجُونِي
فَرَّجْ غْمُومْ نَّاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
نَشَّطْ لْخَيَّلَاتْ
تْحَرّكْ سَرْبَاتْ
نْقُصْ عْلِينَا لْبَاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
عْطِينِي بَنْدِيرْ
مْعَكْ نْسِيرْ
اِتْحَيَّدْ مَنِّي لْوَسْوَاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
لْقُوتْ غْلَا
لَفْقِيرْ شْكَا
فُكْ عْلِينَا لَهْوَاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
دَاوِي لَجْرَاحْ
گُولْ لْبَرَّاحْ
اِفَيَّقْ دُوكْ نَعَّاسْ
...

هَيَّتْ يَا هَيَّاتْ
هَيَّتْ ؤُزِيدْ هَيّتْ
بْنَادَمْ مَسْكُونْ
لْحَاكَمْ مَشْطُونْ
هَمُّو شَفْرَة ؤُلْكَاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
لْمُلكْ ضَاعْ
لْمَرْهُونْ تْبَاعْ
زْفُوطْ لْغَامَلْ طْمَاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
سَخَّنْ طَرحْ
لْمَيَّتْ يَشْطَحْ
تَرْتَاحْ شْوِيَّة لَنْفَاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
كّتْرُو لَبْلَوَاتْ
صْحَابْ شَهَادَاتْ
قْرَايْتْهُمْ بْلَا سَاسْ
...
هَيَّتْ يَا هَيَّاتْ
هَيَّتْ ؤُزِيدْ هَيّتْ
حْنَا لَمْدَاوِيخْ
صْحَابْ تَكْلِيخْ
وْصَفْنَا بِهْ نْتَقَاسْ
...
شعيب صالح المدكوري
تامسنة 05.05.2018