الجزء الثالث(ايه معنى الاسلام)...احمد محمود الشاذلي

المجموعة الثالثة
من (إيه معني الاسلام )
إيه معنى الإسلام يا صاحبي ... إيه معنى الإسلام ؟
الإسلام نخوة و معامله ... وتسامح و سلام
الإسلام أخلاق ... ويّا الخير سبَّاق
ومحبّه لكل البشريّة  ... و تواضع و حياء
_________________________
ــــــــــــــــــــــــــــــــــــــ
الإسلام قالك طب دا إحنا ... فوق الأرض ضيوف
و الضيف لازم يوم ح يروَّح ... مهما يطوف و يشوف
إزرع في دُنياك ...تحصد  في أُخراك
قولى ح تاخد إيه غير ... عملك لا جاه و لا أملاك
ـــــــــــــــــــــــــــــــــــــــــــــــــــــــــــــــ
الإسلام قال لو بالرِّشوة ... أكل كباب و خُشاف
دا القمة الحلال ما أحلاها ... لو تتَّاكل حافْ
تبقي هنيَّة مريَّه ... صحه ميَّة الميَّة
بالبركة ليها طعم السُكر ... و بعرقك مرويَّة
ـــــــــــــــــــــــــــــــــــــــــــــــ
الإسلام لأ عُمرُه ما حلِّلْ   تختين البنات
دا بدعة و تشويه و تخَلُّف ... يفرِزْ إحباطات
الإنسان تكريم ...في احسن تقويم 
و الأنثي ليها شوق في قلوبنا ... و محبة و تعظيم
ـــــــــــــــــــــــــــــــــــــــــــــــــــــــــــــــ 
الاسلام أوعى تكون فَظْ ... قاس الطبع غشيم
اوعى تقلِّد يوم سي السيِّد ... لَأْ . كون أب رحيم
خللى الأسره تحبك ... وافتح ليهم قلبك
ح يقابلوك طايرين م الفرحة ... و حَ يدَّفُّوا ف حُضْنَك
ـــــــــــــــــــــــــــــــــــــــــــــــــــــــــــــــ 
الإسلام قالك طب ربك ... خلق الإنسان ليه
لاجْل الناس تُعبده  و تعمّر ... ارضه و ترجع لِيه
بعدين كشف حساب ... ويّا سؤال و جواب
الكسبان في نعيم الجنّه ... و الخسران في عذاب
ــــــــــــــــــــــــــــــــــــــــــــــــــــــــــــــــــــــ
احمد محمود الشاذلي