الجزء الثاني (ايه معنى الاسلام)...احمد محمود الشاذلي

نستكمل
الجزء التاني من
(إيه معنى الإسلام )
إيه معنى الإسلام يا صاحبي ... إيه معنى الإسلام ؟
الإسلام نخوة و معامله ... وتسامح و سلام
الإسلام أخلاق ... ويّا الخير سبَّاق
ومحبّه لكل البشريّة  ... و تواضع و حياء
_______________________
الإسلام دافعْ عن مصر ... و ارفع ليها الهام
و اللي  يقولَّك طُزْ فْ مصر ... يستاهل إعدام
مصر دي ارضَك . عرضَك . فرضَك ... اعلى و أغلى وسام
من خيرها اتربيِّنا ... من نيلها اتروِّينا
مهما نلف نعود ... نلاقيها صدر حنيِّن لينا
ـــــــــــــــــــــــــــــــــــــــــــــــــــــــــــــــــــــــ
الإسلام دافع عن وطنك ... لو بالروح تفديه
و رسولنا في ليلة الهجرة ... خاطب مكة بإيه
فاتها بقلب حزين متحسَّر ... و دموع مَلْو عنيه
وطنه و مسقط راسُه ... مَجْمَعْ أهلُه و ناسُه
و اللى يفرَّط في تراب بلده ... يشربْ ذُل ف كاسُه
ــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــ
الإسلام بيقولك عيسي ... بشَّر بالمختار
سورة الصف . و سورة مريم ... كلمة حق . مَنَار
ونَصَارَي إخوانّا ... و طعامهم يحلالنا
حُبْ و عشره و نسيج واحد ... نَبْض تاريخ و مواطنة
ــــــــــــــــــــــــــــــــــــــــــــــــــــــــــــــــــــــــــــ
ـــــــــــــــــــــــــــــــ
الإسلام بيقولك صبحّ ... خُدْ بالحُضن أخوك
كل مسيحى ف عيده تقولُّه ... مية مليون مبروك
خُدْ بالك يا عنيّه ... م العُهده العُمَرِيَّه
للــــقدس الـــعربـــية         
و الهجرة لنَجَاشي الحَبَشَة ... و ماريَّا القبطية
ـــــــــــــــــــــــــــــــــــــــــــــــــــــــــــــــــــــــــــــــ
احمد محمود الشاذلي.
و كل عام  انتم بخير
رمضان كريم :)